AHT Gelditu! NAFARROA
Ukrainako gerra hasi ondoren, Europako Batasunak, NATOrekin lankidetza estuan, 2022an Mugikortasun Militarrari buruzko 2.0 Ekintza Plana abian jartzea erabaki zuen. Plan horren bidez, Europako garraio-sare guztiak erabilera zibil eta militarretarako egokitu nahi dira.
Plan horren barruan, abiadura handiko bederatzi trenbide-korridore estrategikoen aldaketa nabarmentzen da; horietako lau lehentasunezko mugikortasun militarreko korridore izendatzen dira. Lau korridore horiek EBko mugetatik haratago hedatuko dira, Ukraina eta Moldaviako hirietara iritsiz. Horietako bat, hain zuzen, Donbaseko Mariupoleraino iritsiko da. Errusiako hirietara iristen ziren korridoreak, aldiz, laburtu egingo dira, estatu horretara iristea eragotziz. Gainera, trenbide-sare horren barruan, tropen eta material militarraren desplazamendu azkarra zailtzen duten 500 puntu kritiko identifikatu ondoren konpondu egin behar dituzte: pisu handiagoak jasateko indartu behar diren zubiak, tamaina handiko ekipoak ahalbidetzeko handitu behar diren tunelak, base militarrekiko lotune eskasak eta, batez ere, estatuen arteko mugetan zailtasun burokratikoak izateagatiko botila- lepoak, benetako «Schengen militar» batera iristeko ezabatu behar direnak. Abiadura handiko trenbide-korridore estrategikoak berrikustean, garrantzi berezia hartzen dute muga-pasabide horiek.
Euskal Herriko kasuan, abiadura handiko ardatz atlantikoaren barruko Burgos-Hendaia-Bordele tartea bizkortzea aipatzen da behin eta berriz, eta, beraz, Frantziako estatuaren gaineko presioak, 2042ra arte bere lurraldean obra horiek kontuan hartzea pentsatzen ez zuena, gero eta handiagoak izango dira. Zentzu horretan, esanguratsua da Burgos eta Gasteiz arteko AHTaren obren esleipenen bizkortzea – 2026ko lehen 2 hilabeteetan 700 milioi eurotik gorako tarteak esleitu dira. Kontuan izan behar da Arakako kuartela, EHko handiena, Jundizko plataforma logistikotik oso gertu dagoela. Gainera, Espainiako eta Frantziako estatuen artean hirugarren trenbide-pasabide bat jartzeko aukera aztertzen ari dira, Canfranceko proiektu zaharra berpiztuz.
Abiadura handiko korridoreak helburu militarretarako egokitzeko gastua dagoeneko jasota dago «Europa Konektatu” programan. Programa horrek, 2028tik 2034ra bitartean guztira 51.000 milioi euroko inbertsiotik, 17.500 euroko gastua aurreikusi du helburu horretarako (heren bat). Ez da ahaztu behar NATOko kide diren herrialdeek iaz gastu militarretarako erabiltzea adostu zuten urteko BPGaren % 5etik, % 1,5 logistika militarra erraztuko duten azpiegituretara bideratuko dela. Laburbilduz, mugikortasun militarra lehentasun estrategikotzat jotzen da. Larrialdiren bat aktibatuz gero, tren- azpiegituren kudeatzaileek zerbitzu zibilak, gehienez 6 orduko epean, eten beharko dituzte, mugikortasun militarrari lehentasuna emateko. Horretarako, trenbide-kudeatzaile eta operadore horiei kalte-ordainak ematea ere aurreikusten da. Mugikortasun militar horrek ahalik eta azkarrena izan behar du. Adibide bat aipatzearren, Gasteiz eta Kiev arteko egungo 40 orduetatik 30 orduetara igarotzea aurreikusten da. Eta ahalik eta azkarren izan behar duen mobilizazio militarraren premia horretan hartzen dute garrantzi estrategikoa AHTren garapenak eta helburu militarretarako egokitzapenak.
Egoera ilun honetan, hemendik aurrera EHan 200 egoitza baino gehiago dituen heriotzaren industriak ez ezik, eraikuntza «zibileko» enpresek ere irabaziak izango dituzte gerraren negozioarekin. Izan ere, krisi eko sozial global honen erdian, kapitalismo transnazionalak, bere beso armatua buru duela, ulertu du bere irtenbide bakarra gerra-ekonomiako erregimen bat ezartzea dela, bere «aurkari» guztiak suntsitzen lagunduko duena. Herrien subiranotasunaren etsai den NATOren inperialismo genozidaren aurrean, AHT Gelditu Nafarroak otsailaren 14an, Iruñean egingo den manifestazioan parte hartzeko deia egiten du.
AHT GELDITU!
GERRA-KAPITALISMOA GELDITU!
NATO GELDITU!
Descubre más desde
Suscríbete y recibe las últimas entradas en tu correo electrónico.
Deja un comentario